Hordamuseet - Bymuseet i Bergen

Om

Folkemuseum som skildrar kulturen i Nord- og Midhordland med vekt på næringane fiske, jordbruk, husflid, handverk og bærekraftige tradisjonar.

Om

Til alle tider har folk flest budd på landet, tett på naturen og i balanse med denne. I Vestland Fylke (Hordaland) var tradisjonelt gardsdrift og fiske, gjerne med handverk som attåtnæring, måten ein overlevde på. Landskapet var velpleid. Dyra gjekk på beite i utmarka og heldt vegetasjonen nede. Bakkemurar og steingardar vart bygd og halde ved like. Om sommaren var innmarka dekka av rad på rad med hesjer fylt med tørrhøy, og åkrar med potet og korn. På lunnane framfor nausta låg tjørebreidde færingar og turka i sola. Livet var styrt av årstidene og ikkje av klokka.

Hordamuseet ligg på Stend, med Fanafjorden som næraste nabo. På området er det tydelege spor etter folk som har levd her i fortida. Gravhaugar, ein stor steinsirkel, og eit 34 meter langt naust frå romartida, er sterke uttrykk for maktkonsentrasjon og kultisk aktivitet, nesten 2000 år attende.

På Stend og Fanafjellet har museet bygd opp att mange gamle hus som er henta frå Nord- og Midhordland. Husa vitnar om levesett i eldre tider, om byggeskikk, handverk og kunnskap utvikla gjennom hundrevis av år.

I hovudbygningen til museet kan ein sjå faste og skiftande utstillingar. Utstillingen i Båthallen syner kor grunnleggjande viktig båten har vore for folk ved kysten.

Sundagar gjennom året er det ulike aktivitetar for born og vaksne på Hordamuseet. På våren arrangerer museet ein familiedag i og kring hovudbygningen, med aktivitetar knytt til påske. I juni er museet vertskap for den tre dagar lange vikingmarknaden «Bjørgvinmarknad». I august er det familiedag i den bygningshistoriske delen av museet med tema knytta til livet på bygda, og aktivitetar på land og sjø. Oppunder jul vert det god gamaldags julestemning med «Førjulsdag» i og kring dei gamle husa på uteområdet.

Grupper på omvising ved førespurnad gjennom heile året.

Kontakt hordamuseet@bymuseet.no

Kjøper du fullpris billett på første museumsbesøk får du 50 % rabatt på inngangsprisen til alle våre andre museer i løpet av året.